இந்தச் சம்பவத்திற்கு பின்னர் எந்தவொரு சர்வதேச கிரிக்கட் போட்டிகளையும் பாகிஸ்தானில் நடத்துவதற்கு ஐ.சி.சி அனுமதிக்கவில்லை.

கடந்த வருடம் மார்ச் மாதம் இடம்பெற்ற டெஸ்ட் போட்டி ஒன்றுக்காக கடாபி மைதானத்திற்கு சென்றுகொண்டிருந்த இலங்கை கிரிக்கட் வீரர்கள் பயணம் செய்த பஸ்ஸை இலக்கு வைத்து தீவிரவாத தாக்குதல் நடத்தப்பட்டது.

இதில் பாதுகாப்பு வீரர்கள், சிவிலியன்கள் உள்ளிட்ட எட்டுப் பேர் கொல்லப்பட்டதுடன், இலங்கை அணிவீரர்கள் ஏழு பேரும் பயிற்சியாளரும் காயமடைந்தனர்.

அதன் பின்னர் எந்தவொரு சர்வதேச கிரிக்கட் போட்டிகளையும் பாகிஸ்தானில் நடத்துவதற்கான அனுமதியை சர்வதேச கிரிக்கட் சம்மேளனம் மறுத்திருந்தது.

இதனால் உலகக் கிண்ண (2011) போட்டிகளை கூட்டாக நடத்துவதற்கான வாய்ப்பையும் பாகிஸ்தான் இழந்தது. அத்துடன் பாகிஸ்தான் பங்குகொள்ளும் சர்வதேச தொடர்களும் பொது இடத்தில் நடத்தப்பட்டன.

தாக்குதலின் பின்னர் அது குறித்த பூரணை விசாரணை நடத்தி அறிக்கை சமர்ப்பிக்குமாறு பாகிஸ்தான் கிரிக்கட் சபையிடம் சர்வதேச கிரிக்கட் சம்மேளனம் கோரிக்கை விடுத்திருந்தது. மீண்டும் மீண்டும் பல தடவை வற்புறுத்தியும் இருந்தது.

ஆனால் இதுவரை எந்தவொரு அறிக்கையையும் பாகிஸ்தான் சார்பில் ஐ.சி.சிக்கு சமர்ப்பிக்கப்பட்டிருக்கவில்லை.

"லாகூர் தாக்கதல் தொடர்பாகவும் பாகிஸ்தானின் பாதுகாப்பு நிலவரம் குறித்து நாங்கள் அறிக்கை சமர்ப்பிக்குமாறு பாகிஸ்தான் கிரிக்கட் சபையிடம் கேட்டிருந்தோம். இதுவரை எங்களுக்கு அவ்வாறான எந்த அறிக்கையும் கிடைக்கவில்லை. இதனால் எதிர்காலத்தில் பாகிஸ்தானில் போட்டிகளை நடத்துவது என்பது சிக்கலான விடயம்"என சர்வதேச கிரிக்கட் சம்மேளனத் தலைவர் ஹரூன் லோர்கட் ரொய்டருக்கு தெரிவித்துள்ளார்.